بوست موجه لكل أب…

البوست ده موجه لكل أب…عايزين نتفق ان الأم فعلا عليها مسؤوليه أكبر من الأب فيما يخص الأبناء مش بس في مجتمعنا جلا ده في اي مجتمع لأن دي فطرة الكون ..وحتي لو كانت الأم عامله..بس زي ما قلنا مسؤوليه أكبر مش إعفاء من المسؤوليه للأب والمسؤوليه مش ماديه فقط!!!!!!
عزيزي الأب..انت المثل الأعلي لابنك و الحب الأول في حياة بنتك❤ لازم تتفهم كده وتشتغل علي نفسك اكتر وشوف انت ممكن تكون مقصر في ايه ناحيتهم..تمويلك بالفلوس عمره ما هيخلق ذكرياتهم لكن تمويلك بالعاطفه و الاندماج معاهم ده اللي هيفضل محفور في ذاكرتهم حتي بعد ما يكبرو و يعجزو كمان😊
كلنا مدركين الضغوط اللي في المجتمع حاليا عشان منبقاش بنتكلم عن المثاليات ..عشان كده زي ما قلنا احنا هدفنا التوعيه و عمل دمج و توازن بين أساليب التربيه الحديثه و ظروف المجتمع..مش مطلوب منك كأب غير وقت مستقطع حسب ظروفك تتكلم فيه مع أولادك.. تشاركهم لعبه..تخرج معاهم..اي نشاط تقدر عليه..انت في نظرهم اكبر داعم يمكن اكتر من الأم..حاول تمارس معاهم اي نشاط حتي لو حوار فقط لمدة دقايق..هيفرق معاهم و هيأثر في شخصيتهم كتير و هيسد فجوات كتير هتظهر مستقبلا في فترة مراهقتهم..
تعنيف الأم أو لومها علي اسلوب تربيتها لهم في حضورهم اكبر خطأ و مش ده اللي هيقربهم منك..التوجيه يكون في عدم حضورهم حتي الخلافات العاديه كمان لازم في عدم تواجدهم..والعكس صحيح ..الأم ممنوع انها تلوم الاب في حضور الاولاد..
وأخيرا إلحق وقتك و علاقتك مع أولادك قبل ما العمر يسرقك و يسرقهم منك😓
كون لأولادك وطن ❤ مش غربه💔
#parent_coaching
Amira Mamdouh

اضف رد

لن يتم نشر البريد الإلكتروني . الحقول المطلوبة مشار لها بـ *

*