سن المراهقة …

سن المراهقه🙈🙈..الأهل بيتعاملو مع المرحله دي انها كابوس☠ وده اللي بيسبب فجوه بينهم و بين أولادهم..المرحله دي لازم تتحضري ليها كأم بمجرد وصول ابنك او بنتك لسن ١٠ سنين..
السؤال ازاي أحضر من السن ده ؟
المفروض انك تتنقلي من مرحلة التعامل معاهم كاطفال وتتعاملي معاهم كاشخاص مسؤولين معاكي واصحاب ليكي..احكي عن مشاكلك خدي رايهم في لبسك خدي رايهم في الاكل اللي هتعمليه النهارده وافتحي قنوات اتصال بينك وبينهم بحيث يكون في مناقشه بلاش جملة(انا قلت لا يبقي لا)🚫 وجملة (( انا اعمل كذا لكن انتم لا))🚫 لازم يكون فيه حوار بحيث أول ما يوصلو لسن ١٢ ((وده أول سلمه في المراهقه)) يستوعبو انك الصديقه مش الام المسيطره الآمر الناهي..هيبداو يتمردو علي أوضاع كتير ويعترضو وده سمة المرحله دي.. دورك هنا مش القمع 🔫دورك الاحتواء👩‍👧‍👦 والمناقشه ومعلش زي ما صبرتي وهم لسه مولودين علي صحيانهم نص الليل ٢٠ مره وتعبهم ومحيالتهم اصبري في السن ده علي عندهم و مناقشاتهم معاكي..ارفعي الحواجز شويه والخط الأحمر خليه بينك شويه😃..وشاركيهم جزء من خصوصياتك عشان يشاركوكي خصوصياتهم..بالنسبه بأه للتكنولوجيا📵 لازم يكون في بروتوكول من قبل الدخول في مرحلة المراهقه بخصوص كلمة السر والمحتويات اللي ابنك او بنتك بيتصفحو فيها طبعا كلمة السر معاكي ويفهمو ان ده حمايه ليهم مش تخوين..متجيش في يوم و ليله تحطي القواعد دي وتلزميهم بالتنفيذ 😠لو عملتي كده هتواجهي حاجه من ٢ يا اما اعتراضات علي كل حاجه يا اما خيانة للأمانه نتيجة الضغط …انتي عايزه تثقي فيهم يبقي لازم يثقو فيكي لان فاقد الشئ لا يعطيه..
قبل ما تطبقي الكلام ده لازم نتفق علي أسس مهمه..
✔مفيش حاجه اسمها ده ولد و دي بنت..الاتنين بيتربو مع اختلاف بسيط بس في طبيعة تكوينهم وميولهم اللي ربنا خلقهم بيها..
✔مش من حق الولد يراقب اخته ولا العكس ولا من حقه يقعد معزز مكرم وهي تخدمه…كل ده نواه انتي بتحطيها في تعاملاتهم الحاليه والمستقبليه
✔مفيش حاجه اسمها اصاحب البنت عشان هي الحنينه والولد ده يع هيكبر ولا هيعبرني..اسمحيلي اقولك ان ده راجع للطريقه اللي هتربي بيها..الحنان و البر مفهوش ولد او بنت
✔اعرفي اصحاب ولادك بس من قبل مرحلة المراهقه..زي ما قلتلك متخديش اي إجراء مرتبط بالفترة دي عشان متقلبش تحدي منهم..الأصحاب اعرفيهم بعزومه ف البيت او خروجه في النادي مع الأهل بدون ما ابنك او بنتك يلاحظو ان ده بيتعمل بشكل تطفلي منك
✔بلاش تقارنيهم بحد لا من العائله ولا من بره العائله
✔حقهم يبقي ليهم خصوصيه بلاش تقتحميها عليهم..لو شلتي حاجز الرهبه بينك و بينهم هيحكولك من غير ما تسالي..مثلا بنتك في السن ده هتنتبه لوحدها لشكل الممثل ده الوسيم الشيك اللي اللي ..انتي بأه شاركيها وعرفيها انه عادي لو حكت عن حد شافته معاكي…وهكذا الولد..
✔مفيش خجل بين ابن او ابنه وامهم..كل المواضيع بلا استثناء مسموح يتكلمو فيها معاكي..انتي بنك المعلومات بتاعهم اوعي تصدي اوعي تقولي ايه السؤال ده ولا كده عيب عشان المعلومه يخدوها منك مش من حد غريب..
✔الأب له دور مهم جدا في كل ده معاكي هنتكلم عنه في بوستات لاحقه.
✔أخيرا..انتي أم واتكرمتي من ربنا للسبب ده..احتسبي صبرك وتعبك في تربية أولادك عند ربنا
تابعونا للمزيد من المعلومات..و نرحب باي استفسار علي رسائل الصفحه
#parent_coaching
Amira

اضف رد

لن يتم نشر البريد الإلكتروني . الحقول المطلوبة مشار لها بـ *

*