ابني عنيف.. بنتي مضطربه و عندها مشاكل سلوكيه ..

ابني عنيف.. بنتي مضطربه و عندها مشاكل سلوكيه ..كل ده كلام بنشتكي بيه من اولادنا و دايما نلوم عليهم و مش بتواجه نفسنا.. و وضحنا قبل كده ان الصفحه هنا هدفها تعديل سلوك الاب والام عشان كده النهارده هنتكلم عن انماط التربيه عند اربع نماذج مختلفه من الاباء هنستعرض كل نموذج و حضراتكم تحددوا اي نموذج فيهم تنتموا ليه..
عندنا اربع نماذج هي:
مسؤول /مستخف / متساهل /استبدادي
كل نموذج عنده صفات مختلفه و ردود افعال مختلفه على اولادهم وكل شخصيه لها علاقه مختلفه مع أولادها.. هنوضح بشكل مبسط سمات كل شخصيه و نسرد نتيجة التربيه حسب كل نموذج..
🔷️ اولا النموذج المسؤول: Authoritative
والنموذج ده يعتبر من اكثر النماذج فاعليه و نجاح لتنشئة اطفال اسوياء.. الوالدين في النموذج ده متفهمين ومدعمين لاولادهم عشان كده النموذج ده بيخلق بيئه صحيه للتربيه وبناء علاقه بين الوالدين والطفل سليمه..
ازاي تحدد انك تنتمي للنموذج ده ⁉️
◼ بتنظم يوم طفلك زي تنظيم مواعيد للاكل و النوم
◼بيكون عندك اساليب عقاب لو تم كسر القواعد
◼ طفلك بيعمل حساب رد فعلك على اي سلوك سلبي يعملوا و بيتوقع برضو رد فعل ايجابي منك على اي سلوك ايجابي منه
◼بيكون في اتصال و حوار بينك وبين طفلك وطفلك بيحس بالارتياح في الحوار معاك
لو كانت المواصفات دي عندك فانت نموذج مسؤول ولازم تدرك ان النموذج ده صعب تطبيقه مع طفل عنده مشاكل سلوكيه تم تشخيصها مسبقا عن طريق متخصص عشان يقدر يحدد اسلوب التعامل مع الطفل لكن لو طفل طبيعي النموذج ده بيخلق منه طفل سوى يقدر يتواصل مع العالم الخارجي.

🔷️ثانيا النموذج المهمل: Neglectful
النموذج ده من اكثر النماذج ضرر و خطوره على الطفل هو نموذج مهمل لسلوك الطفل ورغباته واداؤه والاباء في النموذج ده بيحتاجوا مساعده و تدخل خارجي لبناء اسره سليمه.. ازاي تحدد انك تنتمي للنموذج ده ⁉️
◼مش بتهتم باحتياجات طفلك
◼ مفيش عندك علم بالاحداث في حياه طفلك
◼بتقضي اوقات طويله خارج البيت و الطفل وحيد
◼ مش بتشارك في حياه طفلك بره او جوه البيت
لو الصفات دي عندك يبقى انت من النموذج المهمل وتحتاج ارشاد لان النموذج ده بيخلق طفل عنده حاله من عدم الثقه في العالم الخارجي و غير قادر على تكوين علاقات حتى مع اطفال من سنه.

🔷️ثالثا النموذج المتساهل: Permissive
وده كمان نموذج مضر جدا لان الاباء والامهات في النموذج ده يستجيبوا دايما وغير متطلبين بيميلوا للتساهل وتجنب المواجهه.. وعلى الرغم من ان النموذج ده محب وعاطفي الا انه بيسبب سلوك غير منضبط للطفل لان الطفل مش متعود على المحاسبه و الاب والام بيتجنبوا ازعاج..
ازاي تعرف انك بتنتمي للنموذج ده ⁉️
◼مش بتعمل حدود لطفلك
◼بتتجنب تقلب مزاجه
◼تتجنب النقاش معاه
◼ بتقدم له الرشاوي لتنفيذ طلبك
كل ده يدل ان انت تنتمي للنموذج المتساهل وطبعا النموذج ده هو المفضل للطفل لانه بيحس بالحريه بدون عواقب ومع ذلك زي ما قولنا قبل كده الاطفال بيميلوا للنظام عشان يشعرهم بالامان و من الدراسات تبين ان الاطفال اللي عندهم والدين من النموذج ده معرضين بشكل اكبر للانخراط في فتره المراهقه في سلوكيات سلبيه زي التدخين والمخدرات..

🔷️ رابعا النموذج الاستبدادي: Authoritarian
نموذج متسلط يميل الاباء فيه للطلبات مع ضعف الحوار مع الابناء ودايما يعتمد العقاب للمطالبه بالطاعه ..
ازاي تعرف انك تنتمي للنموذج ده⁉️
◼ عندك قواعد صارمه في كل تفصيله تطالب بتطبيقها
◼غالبا لا تفسر سبب الأمر و تعتمد على كلمة( انا قولت كده)
◼غالبا مش بتمنح طفلك خيارات لاتخاذ القرار
◼ تستخدم العقاب وسيله لتنفيذ اوامرك
◼مش بتظهر لطفلك العاطفه
كل ده معناه انك من النموذج المتسلط وعلى الرغم ان النموذج ده فيه بعض المميزات الا ان المبالغه بتسبب في تربيه شخصيات غير واثقه في نفسها و بتميل للخوف والخجل وربط الطاعه بالحب و عندها دائما صعوبات اجتماعيه…
من خلال العرض ده شوفو انتو مين من النماذج دي و حاولو تطورو و تحسنو من أداءكم عشان توصلو لأول نموذج 😊

اضف رد

لن يتم نشر البريد الإلكتروني . الحقول المطلوبة مشار لها بـ *

*