الطفل الفتان

موضوع النهارده هنتكلم فيه عن الطفل الفتان !!!
ابنك او بنتك متعودين على نقل الكلام و خصوصيات البيت للقريب او الغريب يبقى لازم ندرك ان ده سلوك له أسباب ممكن تكون كالاتي:
١-سلوك مكتسب… بمعنى ان الطفل بيلاحظ كلام الاب والام ونقلهم ل مواقف معينه بتحصل في البيت لاطراف خارجيه فبالتالي بيتعامل انه وضع طبيعي .. و ممكن يكون ده مش بيحصل من الوالدين بس بيشوفه في محيط معارفه ..
٢-احساس بالإهمال…بمعنى انه عايز يدخل في دائرة اهتمام أهله ف بيلفت النظر ليه بالقصص و نقل الكلام..
٣-رغبه في معرفة رد فعل الأهل على سلوك معين حصل و هو بينقله…

الحل ان احنا نبتدي ب نفسنا ولو في اي حوار محتاجين نشاركه مع اي حد يكون في حاله عدم وجود الاولاد..
للاسف في اهالي كتير الطفل لما بيجي عشان يحكي بيصدوه ويتعرضو له بالاهانه والضرب ويوصفوه بالفتان بهدف تقويمه و منعه من السلوك ده وده طبعا غلط الحل ان لما ييجي ينقل الكلام نسمعه و نستوعبه وبعد ما يخلص نبتدى نتناقش معاه هل الكلام اللي قاله ده كان عشان تعبير عن خوف من حاجه معينه او شاف سلوك معين وعايز يعرف رايك و رد فعلك فيه او عشان يحمي حد من أذى ممكن يتعرض له..
اما اذا كان نقل كلام لمجرد النقل يبقى لازم وقفه و يعرف ان ده غلط وسلوك مش مقبول لان لو اتعود على نقل الكلام الناس هتتجنب التعامل معاه حتى اصحابه ونحاول نبسط الفرق بين الفتنه والحوار العادي..
مثلا..الطفل جه حكى عن تصرف زميله مع زميل تاني..بعد ما يخلص الحكايه و بدون مقاطعته أول رد لينا يكون بسؤال انت عملت ايه لما ده حصل؟؟ لو كان ادخل و نقل كلام من طرف لطرف نعرفه ان ده غلط و مرفوض و طبعا الموضوع بيحتاج لتكرار و يعرف انه لازم يعتذر ..اما لو كان ملاحظ و بيحكي بس ف ده سلوك ايجابي يدل انه بيحب الحوار مع أهله..
بالنسبه لنقل كلام البيت و خصوصياته…لازم يعرف انها قاعده عامه بدون استثناءات انه ممنوع نقل الكلام من البيت حتى لأقرب المقربين و يعرف انه غلط و حرام و طبعا النتيجه مش هتظهر بسرعه ف لازم تكرار…و ممكن تحديد مكافاه مفاجأه غير متفق عليها تتقدم للطفل بعد فتره و يعرف ان دي نتيجة محافظته على الأسرار…
و زي ما قلنا ممنوع الصد تماما…بلاش كلمة مش عايز/ه اعرف للطفل..هو عايز يقرب لك بأي شكل ف بلاش تبعده.
لازم الأولاد يحسوا انهم في الصوره دايما و مش كم مهمل…زي ما قلنا لازم ننزل لمستواهم حسب سنهم و نحترم تفكيرهم…بلاش نستنى حدوث كارثه نتيجة رغبتهم في لفت انتباههنا..
قربوا من أولادكم قبل ما هم يبعدوا بعد كده غصب عنكم…القرب حاليا اختياري لكن البعد مستقبلا هيكون إجباري.

اضف رد

لن يتم نشر البريد الإلكتروني . الحقول المطلوبة مشار لها بـ *

*